३३ किलो सुन प्रकरण, पूर्व डिआइजी गोविन्द निरौला पक्राउ

बैशाख, १० काठमाडौं – साढे ३३ केजी सुन प्रकरणमा नेपाल प्रहरीका पूर्व डिआईजी गोविन्द निरौला पक्राउ परेका छन् । गृह मन्त्रालयका सहसचिव ईश्वर पौडेलको नेतृत्वमा बनेको छानविन समितिले थप अनुसन्धानका लागि भन्दै पूर्व डिआइजी निरौलालाई वानेश्वरबाट नियन्त्रणमा लिएको हो । उनलार्इ महानगरीय प्रहरी वृत्त, बानेश्वरको हिरासतमा राखिएको स्राेतले बतायो ।

निरौलाले गत २९ चैतमा अवकाश पाएका प्रहरी अधिकृत हुन् । अनुसन्धानमा संलग्न अधिकारीका अनुसार विमानस्थल प्रहरी प्रमुख रहेका वेला निरौला निरन्तर सुन तस्करी गर्ने गिरोहसँग सम्पर्क रहेका थिए ।

गत ७ माघमा यूएर्इबाट त्रिभुवन अन्तर्राष्ट्रिय विमानस्थल हुँदै आएको तस्करीको साढे ३३ केजी सुन सम्बन्धित व्यक्तिसम्म नपुगी गायब भएको थियो । र, त्यो सुन खोज्ने क्रममा भरिया सनम शाक्यलाई टर्चर दिएर हत्या गरिएको थियो । उक्त प्रकरणमा निरौलासहित अहिलेसम्म २० जना पक्राउ परिसकेका छन् ।

घटनालाई लुकाउन प्रहरीले भूमिका खेलेको आरोप छ । यसबारे छानविनका क्रममा महानगरीय अपराध अनुसन्धान महाशाखाका प्रमख एसएसपी दिवेश लोहोनी, डीएसपी प्रजित केसी र सई बालकृष्ण सञ्जेल हेडक्वार्टर तानिएका थिए ।

सुन गायब र हत्यामा प्रहरीकै मिलेमतो रहेको अाशंकामा अनुसन्धानका लागि गृह मन्त्रालयले सह-सचिव ईश्वर पौडेल नेतृत्वको छानवीन समिति गठन गरेको थियो । घटनामा संलग्न हालसम्म २१ जना पक्राउ परिसकेका छन् । त्यसमध्ये १७ जनालार्इ जिल्ला प्रहरी कार्यालय, मोरङमा राखिएको छ ।

मोरङ प्रहरीको हिरासतमा रहेका अभियुक्तहरूमा ‘चाचाजी’ भन्ने महाबिर गोल्यान, राप्रपा प्रजातान्त्रिकका नेता भुजुङ गुरुङ, बालकृष्ण श्रेष्ठ, कपिलराज पुरी, गोपाल कुमार श्रेष्ठ, दोराम खत्री, सम्बिर प्रसाद तोलाङे, हेमन्त गौतम, पुण्यप्रसाद लामा, विरेन्द्रमान श्रेष्ठ, लालबहादुर मगर, राजु महर्जन, मोहन काफ्ले, नरेन्द्र कार्की, टेकराज मल्ल ठकुरी, लाक्पा शेर्पा र माधव भनिने मदनप्रसाद घिमिरे छन् ।

उनीहरूलार्इ जिल्ला अदालत मोरङबाट ‘संगठित अपराध तथा अपहरण गरी कर्तब्य ज्यान अन्तरगत मुद्दा चलाएर थप अनुसन्धान भइरहेको । घटनामा संलग्न २१ जना फरार छन् । गायब भएको साढे ३३ केजी सुनका मालिक भनिएका चुडामणि उप्रेती (गोरे) सहित रमेश उप्रेती, नर्वदा खरेल उप्रेती (निरु), मोहनकुमार अग्रवाल (एमके), रक्षा भण्डारी, प्रयास पराजुली, रोहित आचार्य, कृष्ण बस्नेत, मोहमद उस्ताम मिया (रुस्तम), भविन राई (तामाङ), कमल कार्की, सन्दिप खड्का, चेतन भण्डारी, सुनिल अग्रवाल, प्रमोद श्रेष्ठ, डोलेन्द्रप्रसाद खरेल, दावा शेर्पा, भोजराज भण्डारी, दुर्गा खरेल (उप्रेती), भीमकुमारी खरेल र सुरेन्द्र गौतमलार्इ प्रहरीले खोजी सूचीमा राखेको स्रोत बताउँछ ।

प्रहरीले उनीहरूसहित ३८ जनाको सम्पत्ति रोक्का गरेको छ । यसअघि सोही प्रकरणमा जोडिएका एक अभियुक्तले महानगरीय प्रहरी वृत्त, अनामनगरको हिरासतमै आत्महत्या गरेका थिए । बर्दियाको राजापुर नगरपालिका–७ का प्रेमराज चौधरीले आत्महत्या गरेका हुन् । उनी नेपाल वायु सेवा निगममा लोडरको रूपमा कार्यरत थिए । बिहान ५ बजे गाडी बाथरुममा उनले आत्महत्या गरेको प्रहरीको भनाइ थियो ।

newyear-RBB

newyear-RBB
http://jagdambacement.com/

तपाईको प्रतिक्रिया

सम्बन्धित समाचार