नवलपरासी, ७ असाेज – ट्रक र कार एकआपसमा ठोक्किँएर दुर्घटना हुँदा पूर्वी नवलपरासीमा ५ जनाको मृत्यु भएको छ । महेन्द्र राजमार्ग अन्तर्गत नवलपरासीकाे कावासोती–८ स्थित खरकट्टा जंगलमा लु १ ख ८५३२ नम्बरको ट्रक र विपरीत दिशाबाट आउँदै गरेको बा २१ च ६४०९ नम्बरको कार ठोक्किँदा कारमा सवार सबैको मृत्यु भएको प्रहरीले जानकारी दिए ।
गए राति करिब १० बजे तिर भएको उक्त दुर्घटनामा मृत्यु हुने पाँचै जना पुरुष रहेका छन् । प्रहरी स्रोतका अनुसार नवलपरासीको देवचुली नगरपालिका १ केउरानीका ३५ वर्षीय दीपक भन्ने पूर्णबहादुर विक, देवचुली-५ का दिलबहादुर ढेंगामगर र कैलालीका सुरज राना मगरको सनाखत भएको छ । अन्य २ जनाको सनाखत हुन बाँकी रहेको प्रहरीले जनाएको छ ।
‘ढोका फोडेर बाहिर निकालेर गम्भीर अवस्थामा चितवन पठाएका थियौं, उनीहरु पाँचै जनालाई अस्पतालले मृत घोषणा गरेको छ,’ प्रहरीले ठक्कर दिने ट्रकलाई प्रहरीले नियन्त्रणमा लिएको छ ।
दुर्घटना लगत्तै उनिहरुलाई उद्धार गरेर उपचारका लागि चितवन लगिए पनि उनीहरुको उपचार सम्भव भएको थिएन । घटनाबारे थप अनुसन्धान भईरहेको प्रहरीले जानकारी दिए ।
