http://jagdambacement.com/

प्रधानमन्त्रीको स्वास्थ्यमा सुधार, भेन्टिलेटरबाट हटाइयो

काठमाडौं, ११ मंसिर – मंगलबार एपेन्डिसाइटिसको शल्यक्रिया गरिएका प्रधानमन्त्री केपी शर्मा ओलीको स्वास्थ्यमा निरन्तर सुधार आएको र उनी कुराकानी गर्न थालेको अस्पतालले जनाएको छ । मनमोहन कार्डियोथोरासिक भास्कुलर तथा टान्सप्लान्ट सेन्टरका कार्यकारी निर्देशक प्रा.डा उत्तमकृष्ण श्रेष्ठले बुधबार बिहान १०ः३० बजे एक विज्ञप्ति जारी गर्दै प्रधानमन्त्रीको स्वास्थ्यमा सुधार आएको जनाएका हुन् ।

प्रधानमन्त्री केपी शर्मा ओलीको स्वास्थ्य मंगलबारको भन्दा सुधार हुँदै गएको छ । बुधबार बिहान उनलाई भेन्टिलेटरबाट पनि हटाइएको छ । प्रधानमन्त्री ओलीका प्रेस सल्लाहकार सूर्य थापाले अनलाइनसँग भने, ‘हिजोको भन्दा स्वास्थ्यमा सुधार भइरहेको छ र एनेस्थेसिया दिदादेखि राखिएको जुन भेन्टिलेटर थियो, त्यो पनि आज बिहान हटाइएको छ ।’

‘विशेषज्ञ चिकित्सकहरूबाट शल्यक्रियापश्चात हाल प्रधानमन्त्रीज्यूलाई सघन उपचारको सम्पूर्ण व्यवस्थासहित निरन्तर निगरानीमा राखिएको छ’, अस्पतालद्वारा जारी प्रेस विज्ञप्तिमा भनिएको छ, ‘सम्माननीयज्यूको स्वास्थ्यमा निरन्तर सुधार भइरहेको र उहाँ अहिले राम्रोसँ कुराकानी गर्न सक्ने अवस्थामा भएको जानकारी गराइन्छ ।’

प्रधानमन्त्री ओलीका प्रेस सल्लाहकार सूर्य थापाले पनि अस्पतालले जारी गरेको विज्ञप्ति ट्विटरमा सेयर गर्दै प्रधानमन्त्रीको स्वास्थ्यमा गुणात्मक सुधार आएको उल्लेख गरेका छन् ।

प्रधानमन्त्री ओलीलाई मंगलबार एपेन्डिसाइटिस भएको थियो । उनको मंगलबार नै त्रिवि शिक्षण अस्पताल महाराजगञ्जस्थित मनमोहन कार्डियोथोरासिक तथा भास्कुलर ट्रान्सप्लान्ट सेन्टरमा शल्यक्रिया गरिएको थियो ।  भेन्टिलेटरबाट निकालिएका उनी अहिले चिकित्सकहरूको निगरानीमा छन् ।

चिकित्सकका अनुसार प्रधानमन्त्री ओलीलाई केही दिन अस्पतालमै राखिने छ ।

तपाईको प्रतिक्रिया

सम्बन्धित समाचार