काठमाडौं,२६ कार्तिक – भदौ २३ गते किशोरहरूको ज्यान जानेगरी भएको गोलीकाण्डबाट सुरु भएको जेनजी प्रदर्शनले दोस्रो दिन, भदौ २४ मा देशभर विध्वंसको रूप लियो । सिंहदरबार, संसद भवन, राष्ट्रपति कार्यालय, निजी सम्पत्ति र सवारी साधनमा भएको आगजनीले मुलुकभरि तनावको वातावरण सिर्जना गर्यो ।
प्रदर्शनकारीहरूले प्रहरीका सवारी साधन जलाउनुका साथै युनिफर्म र हतियार लुटेर अराजकताको पराकाष्ठा नाघेका थिए । यस घटनापछि प्रहरीले उच्छृङ्खल गतिविधिमा संलग्न व्यक्तिहरूको खोजी र पक्राउ अभियान तीव्र पारेको छ । प्रहरी प्रवक्ता, डीआईजी अबि नारायण काफ्लेका अनुसार अहिलेसम्म देशभरबाट ४२९ जनालाई नियन्त्रणमा लिइएको छ । ‘पक्राउ परेका ४२९ जनामाथि कसुरअनुसारको मुद्दा चलाएर अनुसन्धान भइरहेको छ,’ उनले भने ।
आपराधिक पृष्ठभूमिका मुख्य पात्रहरू
प्रहरी अनुसन्धानले जेनजी आन्दोलनको आडमा भएका विध्वंसात्मक गतिविधिहरूमा आपराधिक पृष्ठभूमि भएका व्यक्तिहरूको सक्रिय संलग्नता उजागर गरेको छ । जिल्ला प्रहरी परिसर काठमाडौंका एसपी पवन भट्टराई भन्छन्, ‘हाम्रो नियन्त्रणमा रहेका अधिकांश व्यक्तिको पृष्ठभूमि आपराधिक छ ।’ अनुसन्धानबाट एउटै व्यक्ति धेरै ठाउँमा गएर आपराधिक कार्यमा संलग्न भएको समेत खुलेको छ ।
- आकाश मगर: हत्या र फरारको श्रृङ्खला
नख्खु कारागारबाट भागेका आकाश मगरले असोज १३ गते ठमेलको बुद्धबार गल्लीमा भएको झगडामा मकवानपुरका सुरज तामाङको कैँची प्रहार गरी हत्या गरेको आरोप छ । लागूऔषध मुद्दामा जेल परेका मगर दाङका स्थानीय हुन् र उनी अझै फरार छन् । - अर्जुन बहादुर शाही: धम्की र ठगीको जालो
आफूलाई जेनजी अगुवा दाबी गर्ने अर्जुन बहादुर शाही असोज २९ गते पक्राउ परे। जेनजी प्रदर्शनपछि उच्च तहका कर्मचारीहरूलाई धम्क्याउँदै हिँड्ने शाही बैंकिङ कसुर र वैदेशिक रोजगार ठगीमा संलग्न रहेको प्रहरी अनुसन्धानले देखाएको छ । अछाम घर भएका २६ वर्षीय शाहीले नागरिक उड्डयन प्राधिकरण, वायुसेवा निगम र अख्तियार दुरुपयोग अनुसन्धान आयोगका कार्यालयमा ज्ञापनपत्रका नाममा नेतृत्वलाई धम्क्याएका थिए । उनको साथबाट असईको परिचयपत्रसमेत बरामद भएको छ । - राजु परियार ‘सम्राट’: एसएलआर लुटेर प्रदर्शनमा
ललितपुरका राजु परियार ‘सम्राट’ प्रहरीले बोक्ने एसएलआर (सेल्फ लोडिङ राइफल) लुटेको आरोपमा पक्राउ परेका छन् । परियारले एसएलआर बोकेर सिंहदरबारको मूलगेटमा प्रदर्शन गरेको फोटो र भिडियो सामाजिक सञ्जालमा भाइरल भएका थिए । उनको आपराधिक पृष्ठभूमि रहेको र यसअघि पनि ज्यान मार्ने उद्योग, ठगी, अभद्र व्यवहार र बैंकिङ कसुरसहित ८ वटा मुद्दामा अनुसन्धान भएको प्रहरीको अपराध रेकर्ड सिस्टममा देखिन्छ । - सोनाम थेबे: गुण्डा नाइकेको संरक्षणमा
ताप्लेजुङका सोनाम थेबे गुण्डा नाइके चक्रे मिलन समूहका सदस्य हुन् । भदौ २४ मा बूढानीलकण्ठमा एक प्रहरी अधिकृतको घर जलाउन भीडलाई उत्तेजित पारेको भिडियोका आधारमा उनी पक्राउ परेका छन् । - इन्द्र बहादुर राई: प्रहरी हत्यामा संलग्न
महाराजगन्जमा कार्यरत असई मिलन राय र जवान उत्तम थापाको भदौ २४ मा प्रदर्शनकारीले कुटेर हत्या गरेका थिए । यस घटनामा संलग्न इन्द्र बहादुर राई यसअघि पनि ज्यानसम्बन्धी कसुरमा पक्राउ परेका व्यक्ति हुन् । भोजपुर घर भएका राईको डेराबाट प्रहरीले टाइप–५४ पेस्तोल बरामद गरेको छ । - भुवन शाही: बर्खास्त पूर्व सैनिकको आगजनी
नेपाली सेनाबाट नक्कली चालक अनुमतिपत्र पेस गरी सेवा प्रवेश गरेको भेटिएपछि २०७५ मा बर्खास्त गरिएका भुवन शाही पनि जेनजी प्रदर्शनमा आगजनीमा संलग्न रहेको पाइएको छ । कञ्चनपुरका शाहीले भदौ २४ मा बानेश्वरस्थित ग्लोबल कलेज र प्रहरी वृत्त गौशालामा आगजनी गरेको आरोपमा थुनामा छन् । - समीर श्रेष्ठ र एलेक्स नेपाली: जेलबाट भागेर गोलीकाण्ड
प्रहरी वृत्त सोह्रखुट्टेको हिरासतबाट भागेका नुवाकोटका समीर श्रेष्ठले आफ्ना साथी एलेक्स नेपालीका साथमा रेस्टुरेन्टमा गोली चलाएर भिडियो बनाएका थिए । कार्तिक ११ मा चिनियाँ पेस्तोल ‘टाइप–५४’ सहित पक्राउ परेका समीर लागूऔषध प्रयोगकर्ता पनि हुन् ।
प्रहरीको अनुसन्धानले जेनजी आन्दोलनलाई अराजक र आपराधिक क्रियाकलापको माध्यम बनाइएको देखाएको छ । यसमा ‘अपरिपक्व’ भनिएका युवाहरूलाई आपराधिक पृष्ठभूमिका व्यक्तिहरूले प्रयोग गरेको निष्कर्ष निकालिएको छ । भदौ २४ को विध्वंसमा सहभागी अधिकांश व्यक्तिहरू यसअघि पनि विभिन्न अपराधमा संलग्न रहेको पाइएको छ । यसले जेनजी आन्दोलनको नाममा भएको हिंसा, आगजनी र लुटपाट कुनै स्वस्फूर्त विद्रोह नभई योजनाबद्ध आपराधिक कार्य भएकोप्रहरी बताउँछ ।